ប្រភពមកពី Postkhmer.com
ភ្នំពេញ: ក្នុងគោលបំណងបញ្ចៀសយុវជនកុំឲ្យច្រឡំថា ទិវានៃក្តីស្រឡាញ់ ១៤ កុម្ភៈ ជាថ្ងៃត្រូវដឹកដៃគ្នាចូលបន្ទប់បង្ហាញភាពស្មោះស្ម័គ្រនោះ ទើបមានការបង្កើតព្រឹត្តិការណ៍កម្សាន្ដមួយឈ្មោះថា រត់ដើម្បីបរិច្ចាគ រត់ដើម្បីក្តីស្រឡាញ់ ឬ Couple Run រៀបចំដោយក្រុមហ៊ុន Ice Watch សហការជាមួយក្រសួងអប់រំ យុវជន និងកីឡានិងសហព័ន្ធអត្ដពលកម្មខ្មែរស្ម័គ្រចិត្ដជាលើកដំបូងនៅកម្ពុជា។
កម្មវិធី Couple Run នេះនឹងធ្វើនៅចំថ្ងៃទី ១៤ ខែកុម្ភៈឆ្នាំ ២០១៦ នៅឯបរិវេណខាងក្រៅនៃពហុកីឡដ្ឋានអូឡាំពិក ឬនៅឯទីធ្លាខាងក្រោយផ្សារទំនើបស៊ីធីម៉ល ចាប់ពីវេលាម៉ោង ៣ រសៀល រហូតទៅដល់វេលាម៉ោង ៨ យប់ ដើម្បីប្រមែប្រមូលថវិកាទៅជួយដល់មន្ទីរពេទ្យគន្ធបុប្ផាផងដែរ។
ម៉ូដែលប្រុស និងកញ្ញា ម៉ៃយ៉ា ថតឲ្យកម្មវិធី Couple Run។ រូប សហការី
ប្រធានទីផ្សារនៃក្រុមហ៊ុន Ice Watch លោក មុត បញ្ញា បានឲ្យដឹងពីគោលបំណងនៃការរៀបចំកម្មវិធីនេះថា៖ «យើងមិនមែនរៀបចំឡើងដើម្បីអបអរសាទរថ្ងៃ Valentine's Day ដែលមានន័យបែបយល់ច្រឡំនោះឡើយ ដូច្នេះហើយទើបយើងបង្កើតកម្មវិធី Couple Run មានច្រើនគោលដៅ និងចង់បញ្ជាក់ន័យឲ្យច្បាស់លាស់ថា វាគឺជាថ្ងៃនៃក្តីស្រឡាញ់របស់យើងទាំងអស់គ្នាចំពោះអ្នកនៅជុំវិញខ្លួនរួមមានឪពុកម្តាយ បងប្អូន សាច់ញាតិ មិត្តភក្តិ និងបងប្អូនរួមជាតិតែម្តងនាពេលពួកគេជួបផលលំបាកដោយប្រការណាមួយគឺយើងម្នាក់ៗអាចចែករំលែកនូវក្តីស្រឡាញ់របស់យើងជួយដល់ពួកគាត់ទៅតាមលទ្ធភាព ឬតាមអ្វីដែលយើងអាចជួយបាន»។
សំបុត្រចូលរួមម្នាក់មួយសន្លឹកដែលមានតម្លៃ ៦ ដុល្លារ ហើយប្រាក់បានពីការលក់សំបុត្រនេះចំនួន ៥០ ភាគរយសម្រាប់ជាកម្មវិធីសប្បុរសធម៌ដែលត្រូវយកទៅជូននៅឯមន្ទីរពេទ្យគន្ធបុប្ផា និង ៥០ ភាគរយប្រើប្រាស់សម្រាប់ដំណើរការកម្មវិធីដែលមានរៀបចំនូវល្បែងកម្សាន្តនានាដែរ។
លោក មុត បញ្ញា បង្ហើបឲ្យដឹងកាលពីថ្ងៃទី ១០ ខែកុម្ភៈកន្លងមកថា៖ «បើគិតមកដល់ថ្ងៃនេះយើងបានលក់សំបុត្របានជិត ១០០០ សន្លឹកហើយ ដោយសង្ឃឹមទុកថានឹងអាចលក់បានពី ២០០០ ទៅ ៣០០០ សន្លឹក ដល់ថ្ងៃទី ១៤ ខែកុម្ភៈ។ភាគច្រើនអ្នកដែលបានជាវសំបុត្រកន្លងមកនេះជាស្ថាប័នរដ្ឋ និងក្រុមហ៊ុនឯកជន និងនិស្សិតនៅសាកលវិទ្យាល័យ។ យើងក៏មានលេងល្បែងកម្សាន្តរត់កាន់ដៃគ្នាចម្ងាយ ២,៥ គីឡូម៉ែត្រ និងរត់ចងជើងគ្នាចម្ងាយ ១០០ ម៉ែត្របង្ហាញសាមគ្គីភាព និងភាពសិ្នទ្ធស្នាលផងដែរ»។
សំបុត្រអាចរកជាវបាន នៅសាខាក្រុមហ៊ុន Ice Watch ផ្លូវព្រះមុនីវង្ស សាខាផ្សារទំនើបអ៊ីអនម៉ល ជាន់ទី 4 និងនៅហាង Deluxe Chicken ម្ដុំមាត់ទន្លេ៕
0 comments:
Post a Comment